Tá tús curtha anois le tionscadal mór lenár dtrádstóras stairiúil, an tseanmhonarcha brioscaí le W&R Jacob & Company, a athfhorbairt ina taisclann úrscothach.
Taisclann chartlainne a sheasfaidh an aimsir
A bhuí leis an tionscadal €37 milliún seo, beifear in ann taifid an Stáit a chosaint sna blianta atá le teacht i bhfoirgneamh nua-aimseartha cartlainne, foirgneamh saintógtha de réir dearadh éighníomhach.
Toilleadh stórála níos mó
Beidh an taisclann nua in ann glacadh le 250,000 bosca cartlainne. Nuair a chuirtear é sin leis na láithreacha stórála atá againn ar an láithreán, beimid in ann 600,000 bosca cartlainne a stóráil i láithreán na Cartlainne Náisiúnta ar Shráid an Easpaig.
Agus an fairsingiú sin curtha i gcrích, beidh teacht i bhfad níos fearr ag taighdeoirí ar réimse níos leithne taifead toisc go mbeifear in ann níos mó ábhair a choinneáil ar an láthair agus an méid ábhair a choinneofar as an láthair a laghdú. Dá bharr sin, beidh taighdeoirí in ann teacht níos gasta ar bhailiúcháin agus taighde níos éifeachtaí agus níos cuimsithí a dhéanamh.
Maoiniú
Tá an tionscadal á mhaoiniú ag an Roinn Turasóireachta, Cultúir, Ealaíon, Gaeltachta, Spóirt agus Meán agus á chur i ngníomh i gcomhar le hOifig na nOibreacha Poiblí.